Ціханоўская: «Нам не патрэбныя саюзы, з-за якіх гінуць людзі і губляецца нашая нацыянальная самабытнасць»

— За гады існавання дамовы аб Саюзнай дзяржаве мы зноў і зноў чуем пра новыя пагадненні паміж Расіяй і Беларуссю, — адзначае Святлана Ціханоўская. — Толькі за апошнія паўгода мы сутыкнуліся з размеркаваннем беларускіх выпускнікоў у Расію, дамовай аб гарантыях бяспекі і сумеснымі вайсковымі вучэннямі «брацкіх народаў».

Адзін дыктатарскі рэжым трымаецца за іншы як за адзіную апору сваёй улады. І расплачваецца за гэты саюз незалежнасцю, свабодай і чалавечымі жыццямі.

Пад маркай «брацкага народа» прапаганда хлусіць пра бяспеку, стабільнасць і агульную культуру — пакуль за акном працягваюцца вайна, рэпрэсіі і поўнае падпарадкаванне нашай краіны інтарэсам Крамля. Рэжым Лукашэнкі настроіў супраць сябе кожнага суседа, акрамя аднаго — і больш не мае выбару, акрамя як ісці за ім ва ўсім. Кожны крок, які рэжым робіць насустрач Пуціну, штурхае Беларусь да растварэння ў Расіі.

Але мы — беларусы — не выбіралі гэтага. Нам не патрэбныя саюзы, з-за якіх гінуць людзі і губляецца нашая нацыянальная самабытнасць. Мы ўжо не раз паказвалі, што можам ствараць мастацкія шэдэўры, што становяцца вядомымі на ўвесь свет. Будаваць эканоміку, якая не залежыць ад крэдытаў. Самастойна гадаваць і выхоўваць новых навукоўцаў і вынаходнікаў, што працуюць на блага міру і будучыні, а не вайны і прапаганды.

Перадавайце дзецям нашыя традыцыі і культуру. Падтрымлівайце беларускіх музыкаў, паэтаў і пісьменнікаў, мастакоў. Ва ўсёй разнастайнасці беларускага — знайдзіце нешта блізкае душы. Паверце, ніводны саюз на свеце не варты таго, каб усё гэта страціць, — упэўненая Святлана Ціханоўская.

А вось Аляксандр Лукашэнка у сваім звароце якраз наадварот узгадаў пра «общее отечество» расіян і беларусаў.

— Единое образовательное, информационное, культурное пространство позволяет каждому гражданину Беларуси и России чувствовать себя частью большого целого — нашего общего Отечества. Современная жизнь убедительно демонстрирует, что только сообща мы сможем успешно противостоять вызовам времени. Великая Победа, 80-летие которой мы будем отмечать совсем скоро, доказала неоспоримую истину: пока мы вместе — мы несокрушимы, — гаворыцца ў віншавальным звароце правіцеля.

Асобна ён павіншаваў з гэтым «святам» Уладзіміра Пуціна. А таксама накіраваў звароты прэм'еру РФ Міхаілу Мішусціну, старшыні Савета Федэрацыі Валянціне Мацвіенка, старшыні Дзярждумы Вячаславу Валодзіну і Патрыярху Кірылу.

Нагадаем, 2 красавіка 1996 года Аляксандрам Лукашэнкам і прэзідэнтам РФ Барысам Ельцыным быў падпісаны дагавор аб утварэнні супольнасці Беларусі і Расіі, што прадугледжвала яднанне эканамічнай прасторы і заканадаўчай базы дзвюх краін. Праз год, 2 красавіка 1997 года, у Маскве быў падпісаны Дагавор аб Саюзе Беларусі і Расіі. З таго часу 2 красавіка адзначаецца як дзень яднання народаў Беларусі і Расіі.